Үлкен Алматы өзенінің маңында қар көшкіні жүрді

«Қазселденқорғау» Алматының таулы аймақтарында төрт қар көшкіні болғанын хабарлады. Түскен қардың жалпы көлемі 1500 текше метрге жетті.

«7 наурызда Үлкен Алматы  өзені алабының орта таулы аймағында жүргізілген зерттеу барысында №4, 5, 6 және 7 қар көшкіні төкпесінде төрт рет қар көшкіні жүрді. Түскен қардың жалпы көлемі 1500 текше метр болды. Төмен түскен қар  беткейге тоқтады. Зардап шеккендер мен қираулар жоқ»  делінген «Қазселденқорғау» мекемесінің  Instagram парақшасында.

«Қазселденқорғау»ММ қар көшкінін тудырмау үшін қар басқан беткейлерге шықпауды және алдағы күндері таулы жерлерде жаяу жүруден бас тартуды ұсынады. Қар көшкіні қаупі 8-10 наурыз аралығында сақталады.