Үкімет жүк көліктері үшін ақылы жолдар ашады

Үкімет жүк көліктері үшін ақылы жолдар туралы шешім қабылдады, деп хабарлайды үкіметтің Telegram арнасы.

Премьер-Министр Әлихан Смайыловтың төрағалығымен Үкімет I кезең учаскелерінде жүк көліктерінен ақы алу жүйесін енгізу жұмысын жалғастыру туралы шешім қабылдады.

Бұл бірінші кезекте Қазақстан аумағынан өтетін транзиттік көлікке әсер ететіні хабарланды.

«І кезең аясында ұзындығы 5,5 мың шақырымды құрайтын жолдарда бейнебақылау камераларымен,  байланыс антенналарымен және басқа да құрылғылармен жабдықталған 100-ге жуық бақылау аркалары орнатылды. Бұл жол қозғалысын күтіп ұстауға, қозғалыс қауіпсіздігін арттыруға және байланысты инфрақұрылымды дамытуға  мүмкіндік береді» делінген хабарламада.

Жиында мемлекеттік бюджетке түсетін салмақты азайту және республикалық маңызы бар жолдардың сапасын арттыру мақсатында көлік қозғалысы көп бірқатар тас жолдарға ақылы енгізу жобасы жүзеге асырылып жатқаны айтылды.

Үкімет басшысы жол желісін жаңғырту кезінде бейнебақылауды күшейтуге, жүргізушілер мен жолаушылар қауіпсіздігін арттыруға ерекше назар аудару керектігін қадап айтты.