Әубәкіровке Қызылорда облысының құрметті азаматы атағы берілді

Қазақтың тұңғыш ғарышкері Қызылорда облысының құрметті азаматы атанды.

Облыстық мәслихаттың кезекті сессиясында Қызылорда облысы әкімі аппаратының басшысы Ерлан Райғаниев Тоқтар Әубәкіровке, Нариман Қыпшақбаевқа және Мұрат Бақтиярұлына Қызылорда облысының құрметті азаматы атағын беруді ұсынды.

Еске салайық, Тоқтар Әубәкіров – қазақтың тұңғыш ғарышкері. Қазақстан Әскери-әуе күштерінің генерал-майоры. Қызылорда облысынан Қазақ КСР Жоғарғы Кеңесінің, Қазақстан Республикасы Парламенті Мәжілісінің депутаты болып сайланды. Қазақстанның Халық Қаһарманы, Кеңес Одағының Батыры, КСРО-ның еңбек сіңірген ұшқышы.

– Айта кетейік, Әубәкіровке Қызылорда облысының құрметті тұрғыны атағын беру үшін халық қалаулылары жүз пайыз дауыс берді, - деп хабарлады облыс әкімдігінде.

Нариман Қыпшақбаев - бұрынғы Қазақ КСР Мелиорация және су шаруашылығы министрі. Мұрат Бақтиярұлы – ҚР Парламенті Сенатының депутаты. Екеуі де Арал өңірінің әлеуметтік-экономикалық дамуы үшін көптеген маңызды істер атқарды.