Уақыт белдеуінің өзгеруі қазақстандықтардың денсаулығына қалай әсер етеді?

Астанада өтіп жатқан екі министрліктің кеңейтілген отырысында журналистер жаңа денсаулық сақтау министрі Ақмарал Әлназароваға осы сұрақты қойған. Жаңа министр бұл шешімді орынды деп есептейді, деп хабарлайды Orda.kz порталы.

Еске сала кетейік, 19 қаңтарда үкімет Қазақстанның барлық аумағында UTC+5 уақыт белдеуін енгізу туралы қаулыны бекітті.

Министрдің айтуынша бұл жағдай халыққа оң әсерін тигізеді.

«Адамдардың ғасырлар бойы қалыптасқан биологиялық сағаты бар. Сол биологиялық сағат пен әкімшілік сағат екеуін теңестіруге барлық мемлекеттер бара бермейді. Себебі бұл азаматтардың денсаулығына пайдалы әсері болғанымен, экономикалық тұрғыда кейбір жерде кедергі келтіруі мүмкін. Бірақ мемлекетіміздің осы сұрақты шешудегі ең басты мақсаты – халықтың денсаулығын жақсарту. Мемлекеттің бұл шешімі өте орынды деп есептеймін», – дейді ол. 

Құжатқа сәйкес, елде уақытты есептеу сағат белдеулерінің халықаралық жүйесі бойынша жүргізілетін болады. Қазақстан Республикасының бүкіл аумағында 5-ші сағаттық белдеу қолданылады. Астана, Алматы, Шымкент қалаларының, Абай, Ақмола, Алматы, Жамбыл, Жетісу, Қарағанды, Қостанай, Павлодар, Солтүстік Қазақстан, Түркістан, Ұлытау, Шығыс Қазақстан облыстарының әкімдіктері 2024 жылғы 29 ақпаннан 2024 жылғы 1 наурызға қараған түні (сағат 00:00-де) жергілікті уақытты 1 сағат артқа ауысады.