ТЖМ-нің бұрынғы вице-министріне үкім шықты

Ақмола гарнизонының әскери соты төтенше жағдайлар жөніндегі бұрынғы бірінші вице-министрі Ибрагим Күлшімбаевқа қатысты үкімді жариялады. 

Бұл туралы агенттікте өткен брифингте сыбайлас жемқорлыққа қарсы қызметтің ресми өкілі Данияр Бегайдаров мәлімдеді.

Күлшімбаев қарамағындағыларды жеке үйін салуға мәжбүрлеп, сол арқылы өз өкілетін асыра пайдаланды.  

«Ол өзінің жеке үйін салу үшін әскери қызметшілер мен арнайы техниканы тартуға қатысты ТЖМ ведомстволық бағынысты мекемелерінің басшылығына заңсыз нұсқаулар беру арқылы билікті асыра пайдаланғаны үшін кінәлі деп танылды» деп түсіндірді агенттік.

Сот үкімі бойынша ол бес жылға бас бостандығынан айырылды. Сондай-ақ Күлшімбаевқа мемлекеттік қызметте және квазимемлекеттік сектор субъектілерінде қызмет атқаруға өмір бойы тыйым салынады.

Үкім әлі күшіне енбеді. Сот Күлшімбаевты генерал-майор атағынан айыру туралы президенттің атына ұсыныс енгізуге қаулы етті.

Айта кетелік, 2023 жылдың тамызында Ибрагим Күлшімбаев 2020 жылдан бері атқарып келе жатқан вице-министр қызметінен босатылды. Ол Қарағанды облысының тумасы. 1996 жылдан бастап қорғаныс министрлігінің құрылымдарында, ТЖМ органдарында жұмыс істеді. Астана және Қарағанды облысының ТЖД басқарды.