ҚТЖ Балқаш трассасының бастығы 92 миллион теңге жымқырды деген күдікке ілінді

Соттың мақұлдауымен ол қамауға алынды.

«ҚТЖ» ҰК» АҚ Балқаш трассасының бастығы бюджет қаражатын жымқырды деген күдікпен қамауға алынды, деп хабарлады бас көлік прокуратурасының баспасөз қызметі.

«10 ақпанда «ҚТЖ» ҰК» АҚ Балқаш филиалына қарасты жол қашықтығына жауапты қызметкер ұсталып, кейіннен соттың келісімімен қамауға алынды. Тергеу мәліметтері бойынша, ол басқа лауазымды тұлғалармен бірге теміржолды күрделі жөндеумен байланысты жұмыстардың жекелеген түрлерін орындамай, бюджет қаражатын ұрлаған», - делінген хабарламада.

Келтірілген шығын мөлшері 92 миллион теңгеден асады.

«Сотқа дейінгі тергеу амалдары жүргізілуде. Басқа ақпарат тергеу мүдделері үшін жария етілмеген», - деп атап өтті баспасөз қызметі.