Түркістанға жаңа мәртебе берілуі мүмкін

26 ақпан 2025 12:30 Альфия Адамбек

Фото: Нейрожелі арқылы жасалды

Түркістанға дүниежүзілік қолөнершілер қаласы мәртебесі берілуі мүмкін, деп хабарлайды Orda.kz.

«World Craft Council» халықаралық ұйымының сарапшылары Түркістанға келді. Олар әлемнің түрлі елдеріндегі қолөнершілердің басын Түркістанда қосты.

Сарапшылар мен қолөнершілер 3 күн бойы Түркістан қаласы маңындағы тарихи-мәдени орындарды аралап, өңір қолөнершілері жасаған бұйымдармен танысады. Оқушылар сарайында жеткіншектердің қолынан шыққан дүниелерді көреді.

Қолөнершілер Үндістан, Түркия және Шығыс Азия елдерінен келген.

Комиссия алдағы сәуір айында Түркістанға халықаралық қолөнершілер қаласы мәртебесін беруі мүмкін. Шаһар аталған ұйымға мүше болуға былтыр өтінім берген. Бұған дейін Орта Азиядан бұл ұйымға Өзбекстаннан үш, Қырғызстаннан бір, Қазақстаннан Тараз қаласы мүше болып қабылданған. Мамандар Түркістан шеберлері жасаған керамикалық бұйымдар әсемдігімен, нақышты өрнектерімен және сапасымен ерекшеленетінін айтып жатыр.

«Бұл тізімге енудің өзіндік талаптары мен ерекшеліктері бар. Алдымен қаланың ғасырларға жалғасқан тарихы болуы керек. Екіншіден, ондағы тарихи-мәдени ескерткіштер орналасқан аумақтарға инфрақұрылымдық жүйелер тартылуы тиіс. Ең маңыздысы, жергілікті биліктің қолдауы қажет. Одан кейін ұлттық және халықаралық деңгейде танымал дәстүрлі қолөнері болуы тиіс. Түркістанда керамика жақсы дамыған екен. Біз осы бағытта тізімге қосуға тырысамыз», - деді дүниежүзілік қолөнер кеңесінің Азия-Тынық мұхиты аймағы бойынша сарапшысы Сохан Кумар Джа.

Жаңалықтар

барлық жаңалықтар