Түркістанда жұдырығы жуан шенеунік қызметінен айырылды

Түркістанда төбелеске қатысқан шенеунік қызметінен босатылды, деп хабарлайды Orda.kz.

Әлеуметтік желілерде бірнеше ер адамның бір адамға жабылып жатқан «төбелессымақтың»  видеосы тарап кетті. Бір сәтте көк көйлек киген ер адам жарақат алған азаматқа жасырын түрде соққы береді. Telegram-арна Kozachkow-тың хабарлауынша, жәбірленушінің жақ сүйегі сынған, ол біраз уақыт түтікше арқылы тамақтануға мәжбүр болған.

Кейін бұл соққыны Түркістан облыстық мемлекеттік сәулет-құрылыс басқармасының жетекшісі Сұлтанғали Жалықұл жасағаны анықталды. Мемлекеттік қызмет істері агенттігі тексерістен кейін төбелеске қатысқан шенеунікті әкімдіктен босатуды ұсынып отырғанын мәлімдеді.

«Этика кеңесі Жалықұлдың орынсыз, қоғамға қарсы әрекет еткенін анықтады. Ол өз іс-әрекетімен жалпыға ортақ моральдық-этикалық нормаларды бұзып, өзі өкіл болып отырған мемлекеттік органның беделіне нұқсан келтірді» деп жазылған агенттік хабарламасында. 

Шешім 5 желтоқсанда қабылданған. Енді жергілікті органдар бұл нұсқауды орындауы тиіс.

Орда редакциясы  Түркістан облыстық полиция департаментіне Сұлтанғали Жалықұлдың жаппай төбелеске қатысқаны үшін әкімшілік немесе қылмыстық жауапкершілікке тартылған-тартылмағаны жөнінде сұрау жолдады. Материал жарияланған сәтте ведомстводан жауап келмеді.

Еске салсақ, жақында Түркістан облысында бірден екі әкімдік басқармасының басшылары ұсталды. Олардың бірі бюджет қаражатын ұрлады, ал екіншісі пара берді деген күдікке ілінді