Түркістанда жанармай құю станциясы жарылды: өрт сауда орталығын, дәріхананы және тұрғын үйді шарпыды

Түркістан облысы Қазығұрт ауданының Тұрбат ауылында жанармай құю станциясында жарылыс болды. Оқиға салдарынан жанармай тасымалдау көлігінің жүргізушісі жарақат алды, деп хабарлайды Orda.kz.

Төтенше жағдайлар департаментінің мәліметінше, 7 шілде күні сағат 16:12 шамасында жанармай тасымалдау көлігіне жанармай құйып жатқанда жарылған. Өрт жақын маңдағы ғимараттарға, жеке тұрғын үйге, сауда орталығына, дәріхана мен дүкенге тараған.

«Өрттің жалпы аумағы 855 шаршы метр. Оқиға салдарынан 1996 жылы туған жанармай тасымалдау көлігінің жүргізушісі күйік шалып, ауруханаға жеткізілді. Өрт сағат 18:38-де толық сөндірілді. Оқиға орнында ТЖД, полиция және әкімдік қызметкерлері жұмыс істеді, барлығы 50-ден астам адам және 14 техника жұмылдырылды. Газ-ауа қоспасының тұтану себептері анықталып жатыр», — деп хабарлады Түркістан облысының Төтенше жағдайлар департаменті 

Қазір дәрігерлер жүргізушінің өмірі үшін күресіп жатыр. Оның денесінің 85–90 пайызы күйіп қалған.

Еске сала кетейік, Қонаев қаласындағы жағажайда жас әйел суға батып кетті. Мәжіліс депутаты Бақытжан Базарбек  қайғылы оқиғаның куәсі болды.