Түркістанда өрттен жапа шеккен тағы үш адам жансақтау бөліміне жеткізілді

Түркістан облысының Алғабас ауылында бүгін таңертең екі қабатты үйден шыққан өрттен 12 адам қаза болды, тағы үш адам жансақтау бөліміне жеткізілді, деп хабарлайды Orda.kz.

Түркістан облысындағы төтенше жағдайдан зардап шеккен екі ересек және бір бала жансақтау бөліміне жатқызылды. Дәрігерлер олардың жағдайын ауыр, бірақ тұрақты деп бағалап отыр.

Мемлекет басшысының тапсырмасы бойынша Түркістан облысында болған өртке қатысты арнайы Үкіметтік комиссия құрылды. Комиссияға премьер-министрдің орынбасары Қанат Бозымбаев төрағалық етеді. Оның құрамына Төтенше жағдайлар, Ішкі істер, Денсаулық сақтау, Еңбек және халықты әлеуметтік қорғау министрліктерінің басшылығы, сондай-ақ Түркістан облысы әкімдігінің өкілдері енгізілді.

Еске сала кетейік, өрт 360 шаршы метр аумақта алған. Оқиға орнында барлық жедел қызмет жұмысын жалғастырып жатыр. Тергеу басталды, өрттің себебі анықталып жатыр.