Түркістанда науқасты құтқару үшін жылдамдықты арттырған кардиохирург айыппұл төлемейтін болды

Түркістан соты науқасты құтқару үшін жылдамдықты арттырған кардиохирургке салынған айыппұлды алып тастады, деп хабарлайды Orda.kz. 

Облыстық соттың баспасөз қызметінің мәліметінше, Түркістан орталық ауруханасының кардиохирургы жедел миокард инфарктісі диагнозы қойылған науқастың жүрегіне шұғыл ота жасауға жолға шыққан. Осы уақытта оны патрульдік полиция көліктің алдыңғы әйнектеріне перделер орнатқаны үшін тоқтатып, хаттама толтырған. 

Кейін дәрігер науқасқа асығамын деп, белгіленген қозғалыс жылдамдығынан асып кеткен. 

Сот дәрігер өте қажет болған жағдайда жылдамдықты асырғанын мәлімдеп, істі тоқтатты. Дәрігер жылдамдықты асырғаны үшін айыппұл төлеуден босатылды. Бірақ автокөлік перделерін орнатқаны үшін айыппұл төлейді. 

Айта кетейік, Түркістан облысында арнайы көмекті заңсыз алғандар ұсталды.