Түркістанда 1,5 жасар баланы жұлқылаған тәрбиеші өз еркімен жұмыстан кетті

1,5 жастағы баланың анасы балабақшадағы бейнебақылау камерасын қарап, кейін құзырлы органдарға шағымданған. Болған оқиға бойыша полиция қылмыстық іс қозғады, деп хабарлайды Orda.kz otyrar.kz-ке сілтеме жасап.

"Полиция Түркістан балабақшасындағы баланы ұру дерегі бойынша тергеу жүргізіп жатыр. Анасының арызы бойынша қылмыстық іс қозғалды. Тиісті сараптамалар тағайындалды. Қазіргі уақытта барлық мән-жай анықталып жатыр" деп мәлімдеді Түркістан облыстық полиция департаменті бастығының орынбасары Асылжан Қалдарбеков. 

Облыстық білім басқармасы тәрбиешінің көмекшісі өз өтініші негізінде жұмыстан босатылғанын мәлімдеді.

"Аталған мәселені Түркістан облысының білім басқармасы назарға алды. Оқиға Түркістандағы жекеменшік балабақшалардың бірінде болған. Қазіргі таңда аталған іс бойынша құзырлы органдар жұмыс істеп жатыр. Тәрбиешінің көмекшісі өз еркімен жұмыстан босатылды", – деді Түркістан қаласы білім бөлімінің бас маманы Жансая Орынбасарова. 

Еске салайық, бұған дейін әлеуметтік желіде балабақша қызметкерінің баланы аяусыз жұлқылаған видеосы тараған еді. Оқиға 21 ақпан күні Түркістандағы жекеменшік балабақшалардың бірінде болған.