Түркістан облысының ҰҚК қызметкерлері Назарбаевты қорғауды доғарады

«Ашық НҚА» порталында Түркістан облысы бойынша ҰҚК департаменті ережесіне өзгерістер енгізетін бұйрық жобасы пайда болды. Онда ереженің Қазақстанның тұңғыш президенті Нұрсұлтан Назарбаев туралы бөлігіне өзгерістер енгізілгені жазылған, деп хабарлады Orda.kz.

Енді өңірдегі ҰҚК қызметкерлері «басқа қорғалатын тұлғалардың» қауіпсіздігін қамтамасыз етеді.

Бұйрық мәтініне зер салсақ, Қызметкерлер енді ресми қызметке тағайындалатын тұлғалар жайлы толығырақ ақпарат іздеп, тексеріп, есептерін жүргізіп, әскери қызмет атқара алады.

Еске сала кетсек, Жоғарғы сот астаналық Қайыргелді Смағұловтың бірінші президент Нұрсұлтан Назарбаевқа қатысты мемлекеттің пайдасына активтер мен мүліктерді өндіріп алу туралы талап-арызын құптаудан бас тартқан болатын.

Смағұлов өз талаптарында Назарбаевтың президенттік қызметі кезінде адамзаттың қауіпсіздігіне қатер төндірді деген себеппен дүние-мүлкін тәркілеу туралы арыз жазды.

Алайда «Қазақстан Республикасының Президенті туралы» заңның 36-бабына сәйкес, экс-президент өз өкілеттіктерін жүзеге асыру барысында жасаған әрекеттері үшін жауапкершілікке тартылмайды, тек мемлекетке опасыздық жасаған жағдайда ғана жауап береді делінген.