Түркістан облысының тұрғындары коммуналдық қызмет ақысын артық төлеген

Сарыағаш ауданында «Сарыағаш тұрмыс» кәсіпорны су тарифін көтерді. Іске прокурорлар араласуға мәжбүр болды.

50-ден астам кәсіпкер ағынды суларды қабылдау және тазарту үшін 48 миллион теңгені артық төлеген. Ауыл тұрғындары үшін де сумен жабдықтау тарифтері көтерілді.

«Кәсіпорын 2022-2023 жылдарға ауыз сумен қамтамасыз ету қызметтеріне жоғарылатылған тариф белгіледі. Осының салдарынан 24 025 абонент тоғыз миллион теңгеге жуық артық төлеген» деп түсіндірді Түркістан облысының прокуратурасы.

Сарыағаш ауданының әкімі мен табиғи монополияларды реттеу департаментіне заң бұзушылықтарды жою тапсырылды. Нәтижесінде «Сарыағаш тұрмыс» кәсіпорнына 4,7 миллион теңге айыппұл салынып, лауазымды тұлғаларға сөгіс жарияланды.

Тұтынушыларға келтірілген шығынды қайтаруға уәде берілді.