Түркістан облысының 21 жастағы тұрғыны желі қолданушыларын сан соқтырды

Түркістан облысының тұрғыны әлеуметтік желі қолданушыларын тақырға отырғызды, деп хабарлайды Orda.Kz. 

Тергеу барысында анықталғандай, 21 жастағы күдікті инстаграм платформасын өзінің заңсыз әрекеттерін жүзеге асыру үшін қолданған. Ол әлеуметтік желіде жалған парақша ашып, несие өтінімдерін «кепілдендірілген» түрде мақұлдау, сондай-ақ несие тарихын жақсарту қызметтерін ұсынған.

Қаржылық қиындықтарға тап болған азаматтарды несие тарихына қарамастан қаржы алуға мүмкіндігі барын айтып, алдаған. Күдікті қызметі үшін әртүрлі сомада ақша аударуды талап еткен. Ақшаны алғаннан кейін жәбірленушілермен барлық байланысты үзіп, ізін суытқан. 

Алаяқтың арбауына түскен 16 азамат еліміздің әр аймағынан болғандықтан, оның ізіне түсіп, ұстау полицейлерге айтарлықтай қиындық туғызған. Күдікті Түркістан облысынан табылды. Қазіргі уақытта оның 16 алаяқтық қылмысқа қатысы бары дәлелденді. Жәбірленушілерге келген жалпы шығын көлемі шамамен 1 миллион теңге болды.