Түркістан облысында уран өндірісі болуы мүмкін

Түркістан облысының Созақ ауданындағы Инкай-Мыңқұдық учаскесінде уран кен орны табылуы мүмкін,  осыған орай барлау-зерттеу жұмыстары басталады, деп хабарлайды Orda.kz.

Kazatomprom-ның мәліметінше, барлау жұмыстарына арналған лицензия 5 жылға ұзарту мүмкіндігімен 6 жыл мерзімге берілді.

«Инкай-Мыңқұдық учаскесін барлау минералды-шикізат базасын кеңейту және тиімді пайдалану бойынша бекітілген стратегияның маңызды бөлігі. Сондай-ақ компанияның тұрақты өсуінің кезекті көрсеткіші. Учаскенің әлеуеті зор, оны ұзақ мерзім пайдалануға болады. Біз уран кен орындарын іздеу және барлау саласындағы жұмысымыз әлемдік уран нарығындағы көшбасшылығымызды нығайтатын елеулі нәтижелерге жетеміз деп сенеміз», – деп атап өтті Қазатомөнеркәсіптің Басқарма төрағасы Мейіржан Жүсіпов. 

Сондай-ақ компания Р1 және Р2 санаттары бойынша Инкай-Мыңқұдық учаскесінің болжамды ресурстары 20 мың тонна ураннан асатынын және жақын арада ресурстарды нақтылау және оларды С1 және С2 жоғары санаттарына ауыстыру үшін геологиялық барлау жұмыстарын жүргізу жоспарланып жатқанын, бұл учаскенің әлеуетін тиімді пайдалануға және компанияның ұзақ мерзімді стратегиялық жоспарларын табысты іске асыруға мүмкіндік беретінін мәлімдеді.