Түркістан облысында полицей қылмыскерді қуамын деп қаза тапты

Түркістан облысында құқық бұзушыны қуып жүріп полиция инспекторы көз жұмды, деп хабарлайды Orda.kz. 

Бұл туралы ішкі істер министрі Ержан Сәденов мәлімдеді.

«Қызметтік міндетін атқару барысында құқық бұзушыны қуамын деп қаза тапқан Түркістан облысы полиция департаментінің жол-патрульдік полиция инспекторы, полицияның аға лейтенанты Қанат Ғабитовтың туыстары мен жақындарына шын жүректен көңіл айтамын» деп жазды ол facebook-тегі парақшасында.

Қайғылы оқиға бүгін, 5 наурызда болған. Патрульдік полиция инспекторы Қанат Ғабитов Жібек жолы-Жетісай тас жолында апатқа ұшырады. Тағы алты адам зардап шекті.

Патрульдік полиция экипажы жол қозғалысына қауіп төндірген құқық бұзушыны қуған. Бірақ апатқа ұшырады. Инспектор Ғабитов оқиға орнында қаза тапты. Апаттан зардап шеккендердің қалғаны аудандық ауруханаға жатқызылды.

Осы факті бойынша сотқа дейінгі тергеу басталды.