Түркістан облысында ондаған зауыт- фабрикалар жұмыс істей бастайды

Түркістан облысында 2030 жылға қарай 216,3 мың гектар жерге су үнемдеу технологиясын енгізу жоспарлануда. 

Биыл мұндай технологиялар 22 мың гектарға енгізіледі. Мемлекет басшысының тапсырмасының орындалу барысы туралы Түркістан облысының әкімі Дархан Сатыбалды баяндады.

Сауран ауданы Шаға ауылдық округіне қарасты индустриалды парк аумағында айналмалы және фронтальды жаңбырлатқыш машиналар өндірісі жолға қойылды. Бұл Қазақстанда суды үнемдеу технологияларын кеңінен қолдану үшін су қабылдағыш машиналардың толық циклін шығаруға мүмкіндік беретін көп миллиард долларды құрайтын ірі инвестициялық жоба.

Сондай-ақ, жылына 50 мың гектар жерді технологиямен қамтамасыз ететін тамшылатып суару жүйесін шығаратын тағы екі зауыт ашылмақшы.

Отырар ауданында шетелдік инвестордың қолдауымен тамшылатып суару жүйесін шығаратын төртінші зауыт салынады. Инвестор тоқыма кластерін құру үшін аймаққа 440 миллион доллар инвестициялауға дайын. Нәтижесінде төрт мыңнан астам жұмыс орны ашылады.

Облыста 2024-2027 жылдар аралығында жалпы құны 2,2 трлн теңге болатын 145 инвестициялық жобаны жүзеге асыру жоспарлануда. Бұл өңір экономикасының дамуына тың серпін береді. Биылғы жылы 62 жобаны жүзеге асыру жоспарланса, 24-і іске қосылды, ауқымды жобалар толық іске асырылса, 18 мың жаңа жұмыс орны ашылады.