Түркістан облысында оқушы қызды өлтірген екі жігіт сот алдында отыр

Облыстың мамандандырылған ауданаралық сотында Түркістан облысында 9-сынып оқушысын өлтіруге қатысты атышулы сот отырысы өтіп жатыр.

Бұл туралы марқұмның туыстары хабарлады.

Айыптылар арасында марқұм 15 жастағы Аружан Орынбай оқыған мектептің 11-сынып оқушысы мен оның сыбайласы, Төрткүл ауылының 19 жастағы тұрғыны отыр. Айуандықпен өлтірілген оқушы қыздың анасы қылмыскерлер жазадан құтылып кете алатынын айтады. Айтуларынша, олар ауқатты отбасының балалары және олардың ата-аналары жазаны жеңілдету үшін барын салады.

«Төлеп – бұрынғы әкімнің баласы, ал екінші күдікті – ауқатты отбасыдан. Ауыл тұрғындары қазірдің өзінде бес адвокат жалдадық дейді. Олар прокуратура мен судьяға пара берді деп болжаймыз. Жалғыз талабым – соттың әділ өтуі»,- дейді Аружан Орынбайдың анасы Динара Зілғараева.

Айуандық кісі өлтіру оқиғасы осы жылдың сәуір айында болған. Іс материалдарына сәйкес, сотталушылар Аружанға ұқсайтын жартылай жалаңаш қыздың суретін тауып алып, бопсалауға бел буған. Тергеу барысында кісі өлтірді деген күдіктілер ашық суреттің ғаламторда жарияланбауы үшін қомақты сома талап еткендерін мойындады. Бірақ соңғы кездесуде түн ортасы кезінде айыпталушы мен жәбірленушінің арасында жанжал шыққан. Салдарынан қыздың кеуде тұсына екі рет пышақ сұғып, кейін денесін каналға лақтырып жіберген. Мәйіттің денесі оқиға орнынан екі шақырым жерде табылды.