Түркістан облысында ауыл әкімінің орынбасары қызметкерге қол көтерді

Түркістан облысында ауыл әкімінің орынбасары қызметкері жұмысқа келмегені үшін әкімдік ғимаратында қол жұмсады, деп хабарлайды Orda.kz.

Артынша мәлім болғандай ауыл әкімінің орынбасары Қарабұлақ ауылдық округі әкімі міндетін уақытша атқарып жүрген екен.

Басшыныңқ қызметкерін мойнынан ұстап тұрған видеоны редакцияға жәбір көруші өзі жіберді. Бір  қызығы, ол оқиғаның жай-жапсарын айтып беруге құлық танытпады. Түсініктеме алу үшін біз Сайрам ауданындағы әкімдікке жүгіндік.

«Оқиға Астановтың жұмыс орнында болмауынан туындады. Ол Сиқымбаевқа денсаулығына байланысты науқас қағазын ашқаны туралы хабарламапты. Бұл мәселені талқылау өзара кикілжіңге ұласты. Жанжалдан соң Қарабұлақ ауылдық округі әкімдігінде зерттеу жүргізу үшін арнайы жұмыс тобы құрылды. Нәтиже бойынша шара қабылданады»,  деп түсіндірді аудан әкімдігі.

Сонымен қатар, әкімшілік жанжалдың шешілгенін хабарлады. Сондай-ақ мемлекеттік қызметкерлер арасында бір-біріне деген ешқандай реніштің жоқтығын, дегенмен қызметтік тексеру жүргізілетінін айтты.