Түркістан облысында 34 бала уланды

Түркістан облысы Келес ауылындағы балабақшада 34 бала уланып, ауруханаға түсті.

Бұл туралы Inform.kz хабарлайды.

Балалар 24 маусымда таңғы астан кейін, шамамен сағат 11-де өздерін нашар сезінді. Балабақша қызметкерлері дәрігер мен медбике шақырды.

Редакцияның сауалына Түркістан облысының білім басқармасы былай деп жауап берді:

«Келес ауданының санитарлық-эпидемиологиялық қызметі тексеріс жүргізді. Балаларға таңғы асқа берілген ботқа мен сүт сараптамаға жіберілді. Балалар қазір дәрігерлердің жіті бақылауында. Келес аудандық ішкі істер бөлімінде қылмыстық іс қозғалды», - дейді білім басқармасы.

Кейінірек Түркістан облысының әкімдігі балалардың қазір үйде екенін хабарлады.

«Балалар үйлеріне қайтарылды. Олар амбулаторлық бақылауда. Үшеуі жұқпалы аурулар бөлімінде емделіп жатыр. Жағдайы тұрақты. Таралу жолдары мен көздері зерттелуде» деп жауап берді басқарма.