Түркиядағы наразылық толқыны: Әйелдерді өлтіру оқиғаларынан кейін Ердоған заңды қатайтуға уәде берді

Түркия президенті Реджеп Ердоған шара қолдануға, оның ішінде қылмыскерлерді жазалау жүйесін қатайтуға уәде берді, деп хабарлайды Orda.kz Politico.eu сайтына сілтеме жасап.

Түркияда әйелдерге жасалған аяусыз шабуылдардан кейін елде наразылық толқыны күшейді. Бұл қайғылы оқиғалар заңнаманы күшейтуді және әйелдердің қауіпсіздігін қамтамасыз етуді талап ететін жаппай наразылықтарға әкелді.

Әйелдерге қатысты зорлық-зомбылық тақырыбы түрік қоғамы үшін маңызды болып қала береді, өйткені мұндай қылмыстар соңғы кезде жиі жасалатын болып кетті. Деректерге сүйенсек, биылғы жылдың басынан бері 300-ге жуық әйел кісі қолынан қаза тапқан.

Әсіресе, соңғы үш адам өлтіру оқиғасы жұртшылықтың назарын аударып, елді дүр сілкіндірді. Өткен аптада 19 жастағы қасапшының әйелдің басын кесіп алып, айуандықпен өлтірген оқиғасы елді шулатты. Сол күні ол тағы бір әйелді бауыздап өлтірген.

Сондай-ақ, қыркүйек айының басында 26 жастағы полицей әйелді өлтіру сияқты  қылмыстар жаппай наразылық тудырды. Азаматтар бірнеше айып тағылған қылмыскерлерге қылмысын жалғастыруға мүмкіндік беретін жазасыздықты тоқтатуды талап етуде.

Ердоған алаңдаушылық білдіріп, қылмыстық жүйені қайта қарауға уәде берді. Сотталғандарды, әсіресе, көп қылмыс жасағандарды мерзімінен бұрын босату тәжірибесін тоқтату қажеттігін айтты.