Түркиядағы көтеріліс: Анкарада көшеде жиналуға тыйым салынды

Түркия билігі Анкара қаласында халықтың көшеде топ болып жиналуына тыйым салды, деп хабарлайды Orda.kz.

Еске салайық, Түркияда президент Режеп Тайып Ердоғанның басты оппозициялық қарсыласы Стамбұл мэрі Экрем Имамоғлы ұсталғаннан кейін жаппай наразылықтар басталған еді. Стамбұл мэрін 19 наурыз күні сыбайлас жемқорлыққа қатысы бар деген күдікпен өз үйінен ұстап әкеткен. 

Көтеріліске шыққандар ел президентінің орнын босатуын талап етіп, Экрем Имамоғлыны президенттікке үміткер болуына шарт қойды. Соңғы мәліметтер бойынша, полиция 1100-ден аса адамды ұстады. Тұтқындар арасында журналистер де бар. 

Түркия билігі жағдайдың ушығуына байланысты 1 сәуірге дейін Анкарада адамдардың жиналуына тыйым салды. Сонымен қатар үнпарақтар таратуға, баннерлер ілуге де жол жоқ. Бұған дейін Стамбұл мен Измирде осындай талап қойылған еді.