Түркиядағы апат: марқұм журналистің күйеуі жансақтау бөлімінде көз жұмды

Түркияда бұған дейін әйел мен екі жасар қыз қайтыс болған, сондағы жол апатында жарақат алған  аталған жанұяның отағасы қайтыс болды. Ер адам 6 қыркүйекте жансақтау бөлімінде көз жұмды.

Бұл туралы Orda.kz сыртқы істер министрлігіне сілтеме жасап хабарлайды.

3 қыркүйек күні кешке Аланияда туристік сафари көлігі мен жолаушылар көлігі соқтығысты. Қаза тапқандардың арасында атыраулық журналист Арайлым Нұғманова мен оның екі жасар қызы бар. Отағасы мен ұлы ауруханаға жатқызылды.

«Күйеуі кеше жансақтау бөлімінде қайтыс болды. Туыстары ұл баланы алып кетті, ол қазірдің  Қазақстанда. Қайтыс болған үш адамның денесі бүгін Қазақстанға жөнелтіледі»,- деп түсіндірді СІМ ресми өкілі Айбек Смадияров.

Белгілі болғандай, соқтығыс салдарынан туристер мінген көлік аударылып, қарсы жолаққа шығып кеткен. Жолаушылар кабинадан ұшып түскен. Қаза тапқандар арасында Ресейден келген турист бар.