Түркиядағы Айя София мешітіне кіру шетелдіктер үшін ақылы болады

Ыстамбұлдағы Айя-София мешітіне кіру 2024 жылдың 15 қаңтарынан бастап шетелдіктер үшін ақылы болады.

Бұл туралы Түркияның Мәдениет және туризм министрі Мехмет Нури Ерсой мәлімдеді.

Сонымен бірге құлшылық етуге келген түрік азаматтары үшін мешітке кіру тегін болып қалады. Туристер үшін Айя Софияға барудың қанша тұратыны әлі белгісіз.

«Біз Айя София мешітінде келушілерді басқару жүйесін пайдалануға көшеміз. Зияраттардың сапасы мен қауіпсіздігі артады»,- деді Мехмет Нури Ерсой.

1934 жылы Түркияның тұңғыш президенті Мұстафа Кемал Ататүріктің шешімімен Айя София соборы мұражай мәртебесін алды.

Бірақ 2020 жылы Түркия президенті Режеп Тайып Ердоған бұл жерді мешіт ретінде пайдалану туралы жарлық шығарды. Осыдан кейін Айя Софияға кіру барлық келушілерге, соның ішінде туристерге де тегін болды. Мешіт мәртебесін алғанға дейін мұражайға жазылып немесе кассадан билет сатып алып кіруге болатын еді.

Айта кетейік, бірнеше жыл бұрын Анкараның Айя Софияның атын өзгерту туралы шешімі Грекияда наразылық тудырған болатын. Бұл екі ел үкіметтері қатаң мәлімдемелер алмасатын деңгейге жетті. Режеп Тайып Ердоған Айя софияда жұма намазына қатысып жатқанда, Грекиядағы шерушілер түрік туын өртеп жатты.