Түркияда наразылық білдірген 1000-нан астам адам тұтқындалды

Түркияда бүкіл ел бойынша бес күннен бері наразылық шерулері өтіп жатыр, мыңнан астам адам ұсталып, 123 полиция қызметкері жарақат алды, деп хабарлайды Orda.kz жергілікті БАҚ-қа сілтеме жасап.

Стамбұл мэрі әрі президенттің басты қарсыласы Экрем Имамоғлының тұтқындалуына қатысты шерулер Түркиядағы соңғы он жылдағы ең ауқымды бас көтеру. Шерулер 81 провинцияның кем дегенде 55-інде болып, ел аумағының үштен екісінен астамын қамтыды.

Наразылық білдірушілердің басты талабы – биліктің өз шешімінің әділетсіздігін мойындағаны.

Қамауға алынғанына қарамастан, Экрем Имамоғлы дүйсенбі күні Республикалық халық партиясы атынан (РХП) 2028 жылғы сайлауға президенттікке кандидаты болып бекітілді.

Ал Ішкі істер министрлігі демонстранттар наразылық білдіру құқығын «кері пайдаланып» жатқанын, ал «көшедегі террорға» жол берілмейтінін мәлімдеді. Ірі қалаларда полиция наразылық білдірушілерді көзден жас ағызатын газ бен су атқыштарымен таратуға тырысуда.

Ердоған шерулерді айыптап, РХП-ны «бейбітшілікті бұзып, халықты бөлшектеуге тырысты» деп айыптады.

«Мен сіздерді азаматтардың тыныштығын арандатушылықпен бұзуды тоқтатуға бірнеше рет шақырдым. Егер сіздерде батылдық болса, жемқорлық, ұрлық, пара, заң бұзушылықтар туралы хабарлаңдар. Қазіргі тергеуде тағылған айыптар мен қамауға алынған адамдардың адалдығына кепілдік болса, ашық айтыңыздар. Егер бұлай істеу ниеті болмаса, адамдардың жүйкесіне тимеңдер. Жалған ұрандар мен менталитетке қарсы маргиналды солшыл ұйымдарды біздің полицияға қарсы қоймаңдар», - деді президент 24 наурызда халыққа сөйлеген сөзінде.

Тұтқындалған Имамоғлы өзінің адвокаттары арқылы X желісіндегі жазбасында ереуілшілерге сәлем жолдап, бұл наразылық сайлаушылардың Түркияны Ердоғанның басқаруына «тойғанын» көрсететінін айтты.