Түрікменстанның экс-президентінің қызы вице-президент болып тағайындалды

Түрікменстанның бұрынғы президентінің қызы әкесінің атындағы қордың вице-президенті болып тағайындалды, деп хабарлайды Orda.kz.

Түрікменстанның бұрынғы президенті Гурбангулы Бердімұхамедовтің үлкен қызы Огулжахан Атабаева әкесінің қайырымдылық қорының емдеу істері жөніндегі вице-президенті қызметіне тағайындалды.

Тurkmen.news басылымының мәліметіне қарасақ, бұл қор қамқорлыққа мұқтаж балаларға көмек көрсетумен айналысады. Тағайындау туралы шешім 7 желтоқсан күні Аркадаг қаласында өткен қор басқармасының отырысында қабылданды.

Бұған дейін Огулжахан Атабаева мен оның күйеуі Довлет Атабаев Ұлыбританияда тұрған. Довлет Түрікменстанның Лондондағы елшілігінде кеңесші қызметін атқарған.

Қазір ерлі-зайыптылар Түрікменстанға оралды. БАҚ мәліметінше, Атабаев ресми түрде Мемлекеттік құрылыс комитеті басшысының кеңесшісі ретінде тіркелгенімен, шын мәнінде Аркадагтағы медициналық нысандарды қадағалайды.

Айта кетейік, Аркадаг – Түрікменстанның маңызды жобаларының бірі. Оған Бердімұхамедовтер отбасы белсенді қатысып келеді. Огулжахан Атабаеваның бұл қызметке тағайындалуы олардың ықпалының әлі де күшті екенін көрсетеді.