Туыстар арасындағы жанжал адам өлімімен аяқталды

Алматы облысының Талғар ауданында туыстар арасындағы түсінбеушілік адам өлімімен аяқталды, деп хабарлайды ORDA.

Алматы облыстық Полиция департаменті баспасөз қызметінің мәліметінше, 16 ақпан күні Тұздыбастау ауылындағы жанар-жағармай бекеті аумағында ер адамның мәйіті табылған. Оқиға орнына шұғыл жеткен тәртіп сақшылары марқұмның 48 жастағы Байбұлақ ауылының тұрғыны екенін анықтаған.

«Зорлықпен өлтіру белгілері бар ер адамның мәйіті табылды. Осыған орай, ҚР Қылмыстық кодексінің 99-бабына сәйкес адам өлтіру дерегі бойынша қылмыстық іс қозғалды. Қылмысқа қатысы бар күдіктіні жедел анықтау шаралары барысында 29 жастағы жігіт ұсталды. Сотқа дейінгі тергеу амалдары жүргізілуде. Өзге ақпарат тергеу құпиялылығына байланысты таратылмайды»,- деді Талғар ауданы Полиция басқармасының бастығы Жанболат Зиядин.

Күдікті тергеу барысында кінәсін толығымен мойындаған. Ол марқұмның жақын туысы болып шықты. Ұзақ уақытқа созылған туыстар арасындағы кикілжіңнің соңы өліммен аяқталған.

 «Тергеу барысында 1992 жылы туған жігіттің неге қылмысқа барғаны анықталады. Туысымен сөзге келіспей қалған ол ашуға бой алдырып, қолындағы пышақпен дене жарақатын салғаны белгілі болды. Іс бойынша тиісті сараптамалар тағайындалды. Күдікті уақытша ұстау изоляторына қамауға алынды»,- деп толықтырды Жанболат Зиядин.