«Тұтқындар әлі көп болады»: Сербия президенті Белградтағы түнгі қақтығыстарға пікір білдірді

Бұл туралы Александр Вучич 29 маусымда өткен баспасөз мәслихатында мәлімдеді, деп хабарлайды Orda.kz Novosadska TV арнасына сілтеме жасап.

Жексенбі күні күндіз Сербия президенті өткізген баспасөз мәслихаты бірнеше мәселеге арналды, бірақ Вучич негізінен өткен түнде Белградта наразылық білдірушілер мен полиция арасында болған қақтығыстар жайлы айтты.

Вучичтің айтуынша, өткен түні серб мемлекеті наразылыққа қатысушыларды жеңді. Алайда, оның пікірінше, оппозиция өкілдері полицияның шығуына әдейі итермелеп, күштік құрылымдарға шабуыл жасауды бірінші болып бастаған.

«Әрине, өткен түнде полицияға шабуыл жасағандарға қатысты айтар болсам, тұтқындалатындар әлі де көп болады, бұл соңы емес. Басқа қатысушылар анықталып жатыр», – деді Сербия президенті. 

Сол баспасөз конференциясында ішкі істер министрі Ивица Дачич жараланғандар мен ұсталғандар бойынша жаңа мәліметтерді жариялады:

• 
  48 полиция қызметкері мен 22 бейбіт тұрғын жарақат алған,
• 77 адам ұсталды, оның ішінде 38-і қамауға алынды, ал 26 адамға қылмыстық іс қозғалды.

Сондай-ақ, Вучич қақтығысқа қатысқандарды кешірмейтінін мәлімдеді.

28 маусым күні Сербия астанасы Белградта үкіметке қарсы жаппай наразылық шеруі өтті. Полицияның мәліметі бойынша, көшеге шамамен 36 мың адам шыққан. Тәуелсіз сарапшылардың бағалауы бойынша, бұл сан төрт есе көп болуы мүмкін.

29 маусымға қараған түндегі қақтығыстар – Сербияда бірнеше айға созылған наразылықтардың шарықтау шегі болды. Бұл толқулар 2024 жылдың соңында Нови-Сад қаласындағы вокзалдың төбесі опырылып құлағаннан кейін басталған еді.