Тұрмыстық зорлық-зомбылық кезінде күйеуін абайсызда өлтіріп алған әйел полициядан көмек сұраған

Отбасылық зорлық-зомбылықтан жәбір көріп келе жатқан екі баласы бар ана әзірге қамау изоляторында, деп хабарлайды Orda.kz порталы.

Адам құқықтары жөніндегі уәкілдің Ақтөбе облысы бойынша өкілінің мәліметінше, жәбірленуші осы күнге дейін полиция қызметкерлерінен көмек сұраған, алайда оған ешқандай көмек көрсетілмеген.

Күйеуінің агрессиясының салдары кісі өлімімен аяқталған.

«Енді әйелдің өтініші мынадай – қайғылы оқиғадан кейін оның екі кәмелетке толмаған баласы қайтыс болған күйеуінің туыстарының қамқорлығына берілген, ал олар жеткіншектердің туған анасымен не нағашыларымен сөйлесуіне тыйым салған», – дейді өкіл. 

Сондықтан арызданушы балаларымен сөйлесу құқығын қалпына келтіруді сұраған.

«Мән-жайды зерделеген Уәкіл  жергілікті әкімдіктегі қорғаншылық және қамқоршылық органдарына, сондай-ақ полиция департаментіне балалардың құқықтарына қатысты бұзушылықтарды жою және лауазымды тұлғалардың кінәсі туралы мәселені қарау туралы ұсыныспен жүгінді. Қазақстан Республикасының Неке (ерлі-зайыптылық) және отбасы туралы Кодексінің 61-бабына сәйкес, баланың ата-анасымен, атасы мен әжесімен, аға-інілерімен, апа-сіңлілерімен және өзге де туыстарымен араласуына құқығы бар. Бүгінде балалардың анасының туыстарымен қарым-қатынасы толығымен қалпына келтірілді», – дейді өкіл.

Полиция департаментінің мәліметінше, департаменттің Ішкі қауіпсіздік басқармасы тексеріс жүргізген, нәтижесінде өз міндеттерін  орындамағаны үшін бір қызметкер құқық қорғау органдарынан шығарылса, тағы екі қызметкер қызметінен босатылды.

Кәмелеттік жасқа толмаған балалардың және анасының алдағы тағдыры Адам құқықтары жөніндегі уәкілдің жіті назарында болатыны жайлы мәлімдеді.