Тұрғындар арықтар мен өзендерді тазалауға шықты

Жамбыл облысында су тасқынына қарсы іс-шаралар белсенді жүргізілуде.

Алаңдаған тұрғындар – мемлекеттік мекемелердің, жеке ұйымдардың қызметкерлері, бизнес өкілдері, жастар мен қала тұрғындары ұзындығы 809 шақырым болатын каналдар мен арықтарды тазартты. Сенбілікке 20 мыңнан астам адам қатысып, 2600 тонна қоқыс шығарылды. Қарасу, Түйте, Қарасу-2, Сеңкібай каналдары толығымен тазартылды.

Алдағы күндері Таразда сегіз каналды механикалық тазалау жұмыстары басталады. Сондай-ақ Сеңкібай, Қапал, Төрекелді, Қарасу-1, Қарасу-2, Үшбұлақ каналдарында да жөндеу жұмыстары жүргізіледі.

Бүгінгі таңда Қырғызстанда орналасқан Киров су қоймасы 79,9 пайызға толып, келіп түсетін су көлемі 20,8 м3/с, ағызылатын су көлемі 0,0 м3/с болып отыр. Қордай ауданында орналасқан Қарақоңыр су қоймасы 99 пайызға толып, ағызылатын су көлемі 6,2 м3/с. Сол аудандағы Қақпатас су қоймасы 100 пайызға толып, келіп түсетін су көлемі 2,8 м3/с, ағызылатын су көлемі 0,0 м3/с жетті.

Еліміздің 10 облысында (Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарында) төтенше жағдай жарияланды.