«Тұңғыш қазақ қызы»: Әбиба Әбужақынова әлем чемпионатында дзюдодан күміс жүлде жеңіп алды

Будапешт қаласында дзюдодан өтіп жатқан әлем чемпионатында Әбиба Әбужақынова күміс жүлде иегері атанды, деп хабарлайды Orda.kz.

Венгрия астанасы Будапешт қаласында өтіп жатқан дзюдодан әлем чемпионатында Қазақстан әйелдер құрамасының көшбасшысы Әбиба Әбужақынова 48 келіге дейінгі салмақта сайысқа шығып, тарихи нәтижеге қол жеткізді. Отандасымыз күміс жүлдеге ие болып, ел намысын абыроймен қорғады.

Әлемнің үздік дзюдошылары бас қосқан додада Әбиба бірінен соң бірін мықты қарсыластарын жеңіп, финалға дейін сүрінбей жетті. Шешуші белдесуде италиялық Асунта Скуттомен жекпе-жекке шықты. Скутто дзюдодағы иппон әдісімен жеңіске жетті. 

Айта кетейік, Әбиба Әбужақынова бұған дейін екі рет әлем чемпионатында қола жүлдегер атанған.

Сонымен қатар, ол әлем чемпионатының финалына шыққан тұңғыш қазақ қызы атанды.

Еске сала кетсек, Әбиба Әбужақынова өткен жылы Олимпиада ойындарына қатысып, жүлдесіз оралған. Ол қола жүлдеге таласта швециялық Тара Бабулфаттан жеңіліп, бесінші орын алған еді. Жүлдесіз оралған оған таныстары көлік сыйлап, жұрт әлеуметтік желіде оны қызу талқылады.