Туған шешесін баспанасыз қалдырмақшы болған

Ақмола облысында сот әйелдің немересінің атына рәсімдеген үйі мен жер телімін сыйға беру келісімшартын жарамсыз деп таныды, деп хабарлайды Orda.kz.  

2023 жылы сотқа 76 жастағы Толқын (этикалық себептерге байланысты есімі өзгертілген) жүгініп, үйі мен жер телімін өз меншігіне қайтаруды талап етті. Оның айтуынша, келісімшарт оның саналы келісімінсіз жасалған.  

Толқын екі жақты пневмония, мидың ісінуі және ми қан айналымының бұзылуы диагноздарымен жансақтау бөліміне түскен. Әйелдің ауыр жағдайына қарамастан, қызы оны ауруханадан шығарып, Астанаға алып кеткен. Анасының ес-түссіз күйін пайдаланып, қызы оның жалғыз баспанасын немересінің атына сыйға беру құжатын рәсімдеген.  

«Медициналық құжаттарға сәйкес, Т. екі жақты пневмония, тыныс алу жеткіліксіздігі, энцефалопатия және ми қан айналымының жедел бұзылуы сияқты ауыр созылмалы аурулармен ауырған. Келісімшарт жасалған кезде ол өз әрекеттерінің мәнін  саналы түрде түсініп, басқара алмаған», деп мәлімдеді Ақмола облыстық соты. 

Бірінші сатыдағы сот Толқынның талабын қанағаттандырып, сыйға беру келісімшартын жарамсыз деп таныды. Шешім заңды күшіне енді.