Түрмедегі қылмыскер қазақстандықтарды 25 миллионға алдаған

Сотталған және түрмеде жазасын өтеп жатқан азамат үш жылға жуық уақыт бойы қазақстандықтарды интернет арқылы алдап келген.

Интернет-алаяқты Алматы облысының прокуратурасы анықтады. Ер адам осы уақыт бойы №12 түзеу мекемесінде жазасын өтеп келген. «Сотталғанның» қарқынды әрекеті 2020 жылдың маусым айында ашылғаны белгілі болды.

«2020 жылдың маусымынан 2023 жылдың қаңтарына дейін Ж.А.Ш. түзеу мекемесінде ұялы байланыс операторларының ұялы телефондары мен түрлі сим-карталарын пайдалану арқылы жалпы сомасы 25 миллион теңгеден астам қаржыға 200-ге жуық алаяқтық әрекет жасаған. Аталған дерек 2023 жылдың 2 наурызында мамандандырылған прокуратурамен Қазақстан Республикасы Қылмыстық кодексінің 190-бабының 3-бөлігі, 4-тармағында көзделген «Алаяқтық» бойынша құқық бұзушылық фактісі бойынша тіркеліп, Қонаев қаласының тергеу бөліміне жіберілді» деп хабарлайды мекеме.

Сотталушыдан екі ұялы телефон мен 41 сим-карта тәркіленіп, сол арқылы хат алысып, жәбірленушілерге телефон соққан. Атап өтілгендей, қазір прокуратура сотталғанның басқа да құқық бұзушылықтарын анықтау үшін облыс пен Қазақстан Республикасының басқа да өңірлеріндегі дерекқорға мониторинг жүргізіп жатыр.

Сонымен қатар, түзеу мекемесі қызметкерлерінің әрекетсіздік фактілері мамандандырылған прокуратурамен Қазақстан Республикасы Қылмыстық кодексінің 370-бабының 2-бөлігі «Қызметтегі әрекетсіздік» бойынша тіркеліп, Алматы облысы бойынша сыбайлас жемқорлыққа қарсы қызмет департаментке жолданды.