Түркияда жер сілкінісінен кейінгі 13-ші күні тағы үш адам құтқарылды

12 жасар баласы бар ерлі-зайыптылар жойқын жер сілкінісінен 296 сағат өткен соң ғимарат қирандыларының астынан шығарылды.

Ahaber телеарнасының хабарлауынша, құтқарушылар Хатай қаласында көпқабатты үйдің қирандылары астынан үш адамды алып шыққан. Бастапқыда құтқарушылар су сұраған адам дауысын  естіп қалған.

Ұзақ қазба жұмыстары барысында  жер сілкінісінен кейінгі  296-шы сағатта Самир Мұхаммед Аккар, оның әйелі Рагда және олардың 12 жасар баласы шығарылды. Зардап шеккендер дереу дәрігерлерге тапсырылды. Бірақ кейін баланың қайтыс болғаны белгілі болды. Билік ғимарат құлаған кезде отбасы тағы екі баласынан айырылғанын мәлімдеді.

6 ақпан күні таңертең Түркияда жойқын жер сілкінісі болды. Алдын ала мәліметтер бойынша, 40 мың адам қаза тауып, 100 мыңнан астам адам жарақат алған. Әлемнің 50-ден астам елінен келген жүздеген құтқарушылар оқиға орнында ғимарат қирандыларын әлі де қарап жатыр.