Түркия жер сілкінісінен кейін 612 адамға тергеу бастады

Түркия жер сілкінісі кезінде қираған ғимараттардың сапасына қатысы бар 612 адамға қатысты тергеуді бастады, деп хабарлайды Associated Press.

Әділет министрі Бекир Боздаг 612 күдіктінің 184-інің сотқа дейін қамауда екенін айтты. Олардың арасында құрылыс мердігерлері, ғимараттардың иелері немесе басқарушылары бар.

— Ғимараттардағы осыған қатысты айғақтардың табылуы қылмыстық тергеуге негіз болады, - деді Боздаг.

6 ақпанда Түркияның оңтүстігі мен Сирияның солтүстігінде 48 мыңға жуық адамның өмірін қиған 7,8 баллдық жер сілкінісінің салдары түріктердің қираған немесе қатты зақымданған 173 000 ғимараттың көпшілігінің құрылымдық тұтастығына күмән келтіруге мәжбүр етті. Мамандар қираған үйлердің көбі сапасыз материалдармен салынғанын және көбінесе мемлекеттік стандартқа сай келмейтінін айтады.

Түрік арналары Түркияда жер сілкінісі мен тағы да  қирау қаупінің әлі сейілмегенін хабарлайды. AFAD апаттан зардап шеккендерге көмек көрсету агенттігінің мәліметі бойынша, 6 ақпаннан бері елде  ірілі-ұсақты 9 470  жер сілкінісі болды.

— Бұл ұзақ уақытқа созылады. Біз бұл жер асты дүмпулері кем дегенде екі жылға созылады деп отырмыз, - деді AFAD бас директоры Орхан Татар.

Бұған дейін Түркияда тәртіп сақшылары ғимараттардың жаппай опырылуына қатысы бар Газиантептегі Нұрдағы ауданының әкімі Өккеш Кавакты ұстаған болатын.