Түркия мен Сириядағы жер сілкінісінен қаза тапқандар саны 40 000-ға жетуі мүмкін - БҰҰ

БҰҰ-ның гуманитарлық істер жөніндегі басшысы Мартин Гриффитс Түркия мен Сириядағы жер сілкінісінен қаза тапқандар саны екі есе артуы мүмкін екенін айтты.

Біріккен Ұлттар Ұйымының гуманитарлық миссиясы басшысының айтуынша, жер сілкінісі құрбандары кем дегенде 40 мың адам болады. SkyNews-ке берген сұхбатында Мартин Гриффитс «тағы он мыңдаған адам өлімінің расталуы мүмкін екенін» айтты.

— Менің ойымша, қаза болғандардың санын дәл есептеу қиын, өйткені үйінділерді аршуымыз керек, бірақ мен олардың саны екі есе немесе одан да көп болатынына сенімдімін. Бұл сұмдық. Табиғат өте қатал түрде кері соққы береді. Бұл қатты алаңдатады... қирандылардың астында әлі күнге дейін табылмаған адамдар бар, олардың кейбіреулері тірі болуы мүмкін. Шындығын айтсақ, біз қайтыс болғандардың санын әлі  есептей алған жоқпыз, - деді ол.

Соңғы мәліметтер бойынша, Түркия мен Сирияда қаза тапқандар саны 25 мың адамға жетті. Түрік тарапы  21 848 адам қаза тапты десе, Сирияда 3 553 адам қаза тапқаны хабарланды.