Түркістанда жеке тұрғын үйде жарылыс болып, 4 адам жан сақтау бөліміне түсті

21 наурыз күні кешке Түркістан қаласындағы жеке тұрғын үйлердің бірінде жарылыс болып, 4 адамды күйік шалды. Олардың үшеуі - балалар. 

Жарылыс кешкі сағат жеті жарым шамасында болған. Үйдің ішіндегі 30 жастағы әйел мен оның 2,4,6 жастағы үш баласын күйік шалған. Төрт адам да жан сақтау бөліміне түскен. 

— Кешке үйге келе жатсам қатты жарылыстың дауысын естідім. Келсем адамдар үйдің ішіндегі балаларды шығарып жатыр екен. Балаларды көлікпен облыстық балалар ауруханасына жеткіздік. Жедел жәрдем қызметі жеңгемді қалалық ауруханаға жеткізді. Жағдайы өте қиын. Дәрігерлер оларды 70-90 пайыз күйік шалған деп айтты. Үй толық өртеніп кетті, - дейді жарылыс болған үйдің туысы әрі көршісі Ерсұлтан Берденов. 

Оның айтуынша, балалардың әкесі Түркияда жүк көлігін айдайды. Жарылыс болған кезде жұмыста болған. Қазір Қазақстанға қайтуға билет алған. 

 — Жарылыстың неден болғаны белгісіз. Өрт сөндірушілер үйден газ балонын алып шықты. Бірақ жарылмаған екен деді. Үйге табиғи газ тартылған, - деді Берденов. 

Түркістан облыстық денсаулық сақтау басқармасы төрт адамның ауруханаға түскенін, әйелдің денесін 90 пайыз, балалардың денесін 65-85 пайыз күйік шалғанын растады. Төртеуі де жан сақтау бөлімінде, жағдайлары өте ауыр. 

«ҚазТрансАймақ» акционерлік қоғамы оқиғаға байланысты түсініктеме берді. 

«Оқиғаға газдың шығуы себеп болуы мүмкін. Нақты қай газ түрі екені анықталу үстінде. Үйде  газ балоны да қолданыста болған. Үйден редукторы жұмыс істемейтін 25 литрлік газ балоны табылған. Тұтынушы тарапынан газ желісіне алғашқы қосылу бойынша төлем жасамауына байланысты,  филиал тұтынушыны газ желісіне қоспаған. Тұтынушының газ желісіне өз бетінше қосылғандығы анықталды» делінген хабарламада. 

Оқиға орнында төтенше жағдайлар департаменті мен газ мамандары сараптама жұмыстарын жүргізуде.