Түркістанда диқандардың президентке үндеуінен соң оларға көмек берілетіні хабарланды 

Түркістанда диқандардың президентке үндеуінен соң оларға көмек берілетіні хабарланды.

Демалыс күні Түркістан облысы Сарыағаш ауданындағы қар басып, үсіп қалған жылыжайлардың біріне жиналған шаруалар президент Қасым-Жомарт Тоқаевқа үндеу жолдап, көмек сұрады. Облыста 167 шаруаның 36 гектар жылыжайы ауа-райының қолайсыздығы мен көмір тапшылығынан үсіп қалған.

«Бүгінгі күрделі мәселе - көмір тапшылығы. Егінін егіп, үйін тігіп кредитке алған ақшасын оған құйғандар қауіп астында. Көмір тапшылығынан артымыздағыдай жылыжайлар құлап, еңбегіміз көкке ұшты. Көмір тапшылығын жергілікті өкілетті органдар шешіп бере алмады. Сізден көмек сұраймыз. Тез арада көмір жеткізіп беруді сұраймыз» дейді шаруалардың бірі. Оны жиналған жетпіске жуық адам қолдап, «Көмір жеткізілсін!» деп бірнеше рет айқайлайды.

Видеоүндеуді Orda.kz тілшісіне жіберген диқандардың айтуынша, демалыс күндері түнде Сарыағаш, Келес аудандарында кезекке тұрғандар көмірге таласып қалған. Олар жіберген кезекті видеодан көмір сатып алуға келгендерді полиция бақылап тұрғаны байқалады.

Көп өтпей облыс әкімдігінің баспасөз қызметі жылыжаймен айналысатын шаруаларға көмек берілетінін хабарлады.

Әкімдіктің мәліметінше, облыстағы 167 шаруаның 36 гектар жылыжайы қар салмағын көтере алмай жарамсыз күйге түскен. Аймаққа қажетті көмір жеткізіледі.

«Әкімдік тарапынан тауар өндірушілердің мүлкіне келтірілген нұқсан жөнінде акт ұсынылған жағдайда қаржы ұйымдары алдындағы берешектерінің (несие қаржы) өтеу мерзімдерін 1 жылдық мерзімге кейінге шегеру жөнінде ұсыныстар жолданады. Сондай-ақ зардап шеккен жылыжайларға қаржы ұйымдары арқылы жеңілдетілген несиемен қамтамасыз етуге жұмыстар атқарылды» делінген хабарламада.

Өткен аптада ондаған диқан жылыжайларындағы егінді үсік шалып, қарайып кеткенін айтқан. Олар мұны көмір тапшылығы мен ауа-райының қолайсыздығынан көрген. Диқандар көмір тапшылығы туралы екі ай бұрын айтылса да, нәтиже болмағанына наразы.