Түркістан облысында жауын суына 2 жасар бала тұншығып қайтыс болды

26 қазанға қараған күні Түркістан облысында нөсер жауын жауып, Сарыағаш, Бәйдібек және Қазығұрт аудандарында бірнеше тұрғын үйдің ауласын су алды. Жауын суына 2 жасар бала тұншығып қайтыс болған.

Облыстық төтенше жағдайлар департаменті төтенше жағдайларды жою басқармасының бастығы Талғат Досәлиевтің хабарлауынша, жауын түнімен жауған. Үш ауданда тұрғын үй аулаларын су алған.

– Сарыағаш ауданында екі мал қораға су кіріп, оннан аса мал суға тұншығып өлген. Қазығұрт ауданында бір қора құлады. Осы аудандағы тұрғын үй ауласындағы қазылған шұңқырға жауын суы жиналып, оған 2 жасар бала түсіп, тұншығып қайтыс болды, – дейді басқарма басшысы.

Жауын әлі жауып тұр. Төтеншеліктер жұмысын жалғастырып жатыр.

Департамент тұрғындарға қажетті заттарын, атап айтқанда, жеке бас құжаттарын, дәрі-дәрмектері мен ас-суын дайындап отыруды, су алған жағдайда оқиға орнынан бірден кетуді, балалар мен мүгедек адамдарды жалғыз қалдырмауды ескертті.