Түркістан облысында оқушы қызды өлтірген күдіктілер қылмысқа не үшін барғанын айтты 

Түркістан облысында 9-сынып оқушысын пышақтап, денесін суға тастаған қос күдікті қылмысты қалай жасағандарын айтып берді.

КТК арнасының хабарлауынша, өңірдегі Төрткүл ауылындағы мектептің 11-сынып оқушысы және 19 жастағы жігіт марқұм Аружан Орынбайға ұқсас қыздың жартылай жалаңаш суретін интернеттен тауып алған. Сол суретті бүкіл ауылға жаймас үшін Аружаннан ақша бопсаламақ болыпты. Бірақ екі арада жанжал шығып, олар 15 жастағы оқушыны өз үйінің артында пышақтап тастаған. Содан кейін денесін арыққа ағызып жіберген. Олар қылмысты қалай жасағанын айтып, тергеушілерге оқиға орнын көрсетті.

Күдіктілер өз кінәсін мойындап, қылмыс әрекетін қалай жасағанын оқиға орнында нақтылап көрсетті. Бүгінгі таңда екі жігіт қамауда. Оларға қатысты ҚР ҚК-нің 99-бабы, 2-бөлігімен «адам өлтіру» бойынша сотқа дейінгі тергеп-тексеру жүргізіліп жатыр.