Түркістан облысында мемлекеттік ревизор 26 млн теңге пара алған

Сыбайлас жемқорлыққа қарсы қызмет білім беру саласындағы ірі жымқыруларды тергеуді жалғастырып жатыр. Қылмыстар мемлекеттік аудиторлардың жасыруымен жасалғаны қылмыстық іс материалдарымен расталды.

Жетісу облысында бюджет қаражаты қайтыс болып кеткен адамдардың шоттарына ақша аудару және мектеп қызметкерлерінің жалақысын асыра есептеп, кейіннен оларды қолма-қол ақшаға айналдырып, иемдену арқылы ұрланған.

Агенттік мәліметіне сәйкес, тергеу барысында Алматы облысы Тексеру комиссиясының мемлекеттік аудиторы 500 мың теңге сомасында пара алғаны әшкереленді. Ол Талдықорған қаласындағы мектептердің бірінде аудиторлық тексерістің оң қорытындысы үшін пара алған. Қазіргі уақытта аудитор сотқа тартылды.

Алматы облысында облыстық тексеру комиссиясы бөлімінің басшысы Қарасай ауданының білім бөлімі есепшісінен аудиторлық тексерудің оң нәтижесі үшін 1 млн теңге пара алған.

Сонымен қатар, Түркістан облысында мемлекеттік ревизор - облыстық Тексеру комиссиясының бас инспекторы парақорлықпен әшкереленді. Ол Сарыағаш ауданындағы мектептердің бірінде аудиторлық тексерістің оң қорытындысы үшін 26 млн теңге көлемінде пара алды деп күдіктелуде. Күдікті ұсталып, уақытша ұстау изоляторына қамалды.