Түркістан облысында мектептің кәріз суын арыққа төккен

Ақбай ауылындағы мектептің кәріз суы  тікелей арыққа құйылған. Ал адамдар бұл суды тек бау-бақша суару үшін ғана емес, сонымен қатар тұрмыстық, оның ішінде ауызсу үшін де пайдаланады.

Нәжіс иісі аңқыған лас су мектеп септигінен электр сорғымен арыққа жіберілді. Бұны  адамдар телефон камерасына түсірген видео растайды. Ал бұл, тұрғындардың айтуынша, бірінші рет болып отырған оқиға емес.

«Алғашында бақшаны осылай суарамыз деді. Сосын олар бұл жерде каналдан су сорып жатырмыз деп басқаша сылтау айта бастады, сосын мектеп ғимаратында кран ашық қалды, сондықтан толып кетті дейді. Жауапкершілік жоқ», – деп ашуланды Ақбай ауылының тұрғыны Раушан Сайдиназаров.

Арық суын жергілікті тұрғындар бақша суару, егіс алқаптары мен жылыжайларды суару үшін ғана пайдаланбайды. Сонымен қатар киім жууға, ыдыс жууға және тамақ дайындауға да қолданады. Себебі, ауылда ауыз су тапшылығы бар.

«Мұнда көп адам тұрады. Бұның салдары әртүрлі жағдайға алып келуі мүмкін, сонда бірден бұл жерде карантин жариялайды», – дейді Ақбай ауылының тұрғыны Үмітжан Қазақбаев.

Шара қолдануды талап еткен тұрғындар мектеп басшылығына, аудан әкімі мен ауылдық округ басшысына, тіпті білім бөліміне де жүгінген. Олардың әрқайсы бұл  мәселенің олардың құзыретінде емес екенін қайталай берген. Сондықтан тұрғындарар Almaty.tv сайтына жүгінген.

Ақпаратты аудандық білім бөліміндегілер растады. Олардың айтуынша, бір оқушы  кранды жабуды ұмытып кеткен, соның кесірінен септик толып, қызметкерлер лас суды жақын маңдағы каналға айдауды ұйғарған. Тәртіп бұзушы жазаға тартылып, мектеп директорына сөгіс жарияланды. Мектеп айыппұл төлейді, бірақ бұл шара санитарлық-эпидемиологиялық стансасы тексергеннен кейін ғана қолданылады.