Түркістан облысында 11 тас жолды су шайып, ондаған мал өлді  

Соңғы екі тәулікте Түркістан облысында қатты жауын-шашынмен еріген қардан су тасып 11 тас жолды шайып кеткен. Бәйдібек ауданы Шақпақ ауылының 36 бас малы суға батып өлген. 

Облыстық төтенше жағдайлар департаментінің Orda.kz тілшісіне хабарлауынша, судың ағысы азайып, қауіп сейілгенімен Сауран ауданындағы ахуал қатаң бақылауда. Арыс және Кентау қаласынан бөлек су алған ауылдардың саны 21-ге жеткен. 234 үйдің ауласы мен қорасына су кірген. Арыс қаласында бір үй бұзылған. Ордабасы ауданындағы бір мектепке су кіргені анықталған. 

«Сауран ауданы мен Кентау қаласында эвакуацияланған адамдардың саны – 204. Олардың 111-і  - бала. Қазірге 17 адам үйіне қайтты. Бәйдібек ауданы Шақпақ ауылында 36 бас мал суға ағып кеткені тіркелді» делінген хабарламада. 

Облыстық жол басқармасының мәліметінше, жауын суы облыстық маңызы бар 11 жолды шайып кеткен. 

2 ақпанға қараған түні Түркістан облысында қатты жауын-шашын мен қалың қар еріп, бірнеше қала мен ауылдарға су кірген. 3 ақпанға қараған түні су басу қаупінен Шаға ауылының тұрғындары өздерінің айтуымен туыстарының үйіне жеткізілген. Жалпы су алу қаупі бар ауылдардан мыңға жуық мал шығарылған. 

Төтенше жағдайға байланысты арнайы штаб жұмысын жалғастырып жатыр. 

Ресми мәлімет бойынша, қайтыс болғандар мен зардап шеккендер жоқ.