Түркістан облысы Шаға ауылының тұрғындары қауіпсіз жерге көшірілді 

3 ақпанға қараған түні Түркістан облысы Сауран ауданы Шаға ауылын су басу қаупі туып, екі жүзден аса адам қауіпсіз жерге көшірілді. Майдантал ауылын су басу қаупі сейілді. Облыста жауын тоқтағанымен, су ағыны тоқтамай тұр. 

Бүгін аймаққа үкіметтің тапсырмасымен төтенше жағдайлар министрі Юрий Ильин келіп, жедел кеңес өткізгені хабарланды.  

Соңғы ресми деректерге қарағанда, облыстағы Кентау қаласы мен жиырма ауылдағы 234 үйдің ауласы мен 27 көшені су алған. 

«Ағын су Сырдарияға құйылып жатыр. Енді тек Түркістан облысындағы жағдайды емес Қызылорда облысын да бақылауға алу қажет» деді министр жедел кеңесте. 

Облыстық полиция департаменті су тасқынына байланысты Созақ ауданы арқылы өтетін «Ұланбел-Созақ-Екпінді», Бәйдібек ауданы аумағындағы «Шаян-Шолаққорған» тас жолы жабылғанын хабарлап, өзге жеті ауданда да жүргізушілерді сақ болуға шақырды.  

Су басу қаупінен эвакуацияланған Шаға ауылының тұрғындары өздерінің айтуымен туыстарының үйіне жеткізілген. Жалпы су алу қаупі бар ауылдардан мыңға жуық мал шығарылған. 

Төтенше жағдайға байланысты арнайы штаб жұмысын жалғастырып жатыр. Су басу қаупі туындағанда адамдарды орналастыруға орындар дайындалған. 

Ресми мәлімет бойынша, қайтыс болғандар мен зардап шеккендер жоқ. 

2 ақпан күні Бәйдібек ауданында ағын судың ішінде қалған үш адамның құтқарылғаны хабарланды. Оның бірі - аяғы ауыр әйел, екіншісі – бала. Тұрғындар Созақ ауданындағы  Шолаққорғанға алып баратын тас жолдың бойында жеңіл көліктің суға батқаны туралы видео таратты. 

Түркістан облысындағы бірнеше ауылды жауын суы басқаны туралы ақпарат 2 ақпанға қараған түні тарады. Қатты жауын-шашын мен қалың қардың еруінен су деңгейі көтеріліп, ауылдарды басқан. Сауран ауданында 11 мектептің 4 мыңға жуық оқушысы онлайн оқуға жіберілді. 7 балабақша жұмысын уақытша тоқтатты.