Түркі мемлекеттері біртұтас әліпби жасауды жоспарлап отыр

Түркі мемлекеттері біртұтас әліпби жасауды жоспарлап отыр, деп хабарлайды Түркияның Anadolu ақпарат агенттігі.

«Тіл бірлігі мен түркі мемлекеттерінің ортақ әліпбиге көшу үдерісін жеделдету мақсатында бірыңғай әліпби жасау жөніндегі комиссия құрылды» делінген хабарламада.

Бурса қаласында түркі әлемінің ортақ әліпбиіне арналған семинар өтіп, онда бірыңғай әліпби жасау жөніндегі комиссия құру туралы шешім қабылданды.

Комиссия құрамына түркі мемлекеттеріндегі тіл саясаты мәселелерімен айналысатын әр ресми құрылымнан екі мүше кіреді.

Семинарға Ататүрік атындағы Мәдениет, тіл және тарих жөніндегі Жоғарғы Кеңестің басшысы, профессор, доктор Мухаммет Хекимоглу мен Әзірбайжаннан келген UTC Ақсақалдар кеңесінің мүшесі Хасан Гасанов та қатысты.