«Транстелекоммен» қош айтысқан Нұрәлі Әлиевтің орнын кім басты?

Экс-президент Нұрсұлтан Назарбаевтың немересі Нұрәлі Әлиевтің «Транстелеком» АҚ-тағы өз үлесін сатқаннан кейін, оның орнына компанияның директорлар кеңесіне Jusan Mobile-дың топ-менеджерлері кірді, деп хабарлайды Orda.kz.

KASE-де жарияланған құжатқа сәйкес, «Транстелеком» директорлар кеңесінің құрамы 12 ақпанда өзгертілді. Нұрәлі Әлиевпен қатар  екі топ-менеджер болған Берік Өтемұрат пен Эльдар Ғұмаров кеңестен шығарылды. 

Нұрәлі Әлиевпен бірге компания акцияларының 75%-ын бақылаған Дмитрий Покупателев директорлар кеңесінің төрағасы болып қайта тағайындалды.  

Жаңартылған құрамға Jusan Mobile-дың үш өкілі кірді:  

• Қайрат Балықбаев– Jusan Mobile басқарма төрағасы, бұрынғы ақпарат және коммуникациялар вице-министрі, Еуразиялық даму банкінің цифрлық бастамалар дирекциясының басқарушы директоры, сауда және интеграция вице-министрі.  
• Андрей Марченко – Jusan Mobile директорлар кеңесінің төрағасы.  
• Нұрлан Арынғазиев– Jusan Mobile директорлар кеңесінің мүшесі

KASE-де жарияланған құжатқа сәйкес, директорлар кеңесінің жаңа мүшелері «Unit Telecom» ЖШС акционері өкілдері ретінде көрсетілген. 2024 жылғы 11 ақпандағы мәлімет бойынша, бұл компанияның құрылтайшылары қатарында Дмитрий Покупателев пен Нұрәлі Әлиев деп жазылған.  Алайда, жуырда бұл деректер өзгеруі мүмкін, себебі Әлиев «Транстелеком»-ды сататынын жақында ғана мәлімдеді.

Сонымен қатар, 13 ақпанда Қазақстанның ең бай бизнесмені Вячеслав Ким Ғалымжан Есеновтен Jusan Bank акцияларының 97,5%-ын сатып алатынын растады. Ал Есенов Jusan Mobile-ды JV Holding Ltd арқылы басқарады. Осыған байланысты, «Транстелеком» келісімінің артында да дәл осы тұлға тұруы мүмкін.