Трансгендер модельді өлтірген жігіт өмір бойына бас бостандығынан айырылды

Тбилисидегі сот 26 жастағы Беку Джайаниді трансгендер модель Кесария Абрамидзені өлтіргені үшін өмір бойына бас бостандығынан айырды, деп хабарлайды Orda.kz. 

Ер адам трансгендерді асқан жауыздықпен бірнеше рет пышақтап өлтірген. Сотталушы марқұмның гендерлік таңдауына қарсы болған. Сондықтан алдын ала жоспарлап, оны қасақана өлтірген. 

Қайғылы оқиға 2024 жылдың 18 қыркүйегінде Грузия астанасында болды. Тергеу мәліметтері бойынша, кісі өлтіру Грузия парламенті ЛГБТ насихатына тыйым салатын заң қабылдағаннан кейінгі күні болған. Беку Джайани сот отырысына қатыспады. 

Кесария Абрамидзе Грузиядағы ең танымал трансгендер модельдердің бірі болған. 2018 жылы ол Miss Trans Star International халықаралық сұлулық байқауында елінің атынан қатысты.

Айта кетейік, алжирлік Олимпиада чемпионы, боксшы Иман Хелиф кәсіби боксқа ауысқысы келеді. Ол 2024 жылғы Париж Олимпиадасы финалында қытайлық спортшы Ян Люді 5-0 есебімен жеңіп, алтын медаль алған еді.