Трамптың талабымен NASA қызметкерлерінің төрттен біріне жуығын қысқартады

Дональд Трамп әкімшілігінің бастамасымен жүргізілген қысқарту саясаты аясында NASA 3 870 қызметкерінен айырылып отыр, деп хабарлайды Orda.kz.       

Аэронавтика және ғарыш кеңістігін зерттеу жөніндегі ұлттық басқарма (NASA) шамамен 20% қызметкерлерін қысқартады, деп жазады DW. Бұл — Трамп әкімшілігі бастамашылық еткен мемлекеттік мекемелердегі ауқымды кадрлық қысқартулармен байланысты. Қысқартудан кейін NASA қызметкерлерінің жалпы саны шамамен 14 мың адам болады.

Шілде айында агенттік директорының міндетін атқарушы болып көлік министрі Шон Даффи тағайындалды. Ол Илон Маск ұсынған, бірақ мақұлданбаған кандидат Джаред Айзекманның орнына келген.

Қызметкерлердің күрт қысқаруы кәсіби ортада алаңдаушылық туғызды. «Вояджер декларациясы» атты ашық хатта NASA-ның жүздеген қазіргі және бұрынғы қызметкерлері Даффиге кадрлық шығындармен байланысты қауіп-қатерлер туралы ескерту жасады.