Трампқа қастандық жасаған адам өмір бойы бас бостандығынан айырылуы мүмкін

Райан Рут 15 қыркүйекте Дональд Трамптың гольф-клубының қоршауында автоматпен жүргенде ұсталғаннан кейін, қастандық жасамақ болғаны үшін айыпталды, деп хабарлайды Orda.kz.

Бұл туралы сейсенбіде АҚШ-тың әділет министрлігі хабарлады.

«Әділет министрлігі біздің демократиямыздың негізіне қарсы зорлық-зомбылық әрекеттеріне төзбейді және мұндай әрекеттерді жүзеге асыратын қылмыскерлерді тауып, жауапқа тартамыз», — деді АҚШ-тың министрліктің басшысы, бас прокуроры Меррик Гарленд.

58 жастағы Райан Рут тұтқындалған күннен бастап қамауда отыр, бұған дейін қару-жараққа қатысты екі бап бойынша айыпталған болатын. Осы қару-жарақ ұстағаны үшін 20 жылға дейін бас бостандығынан айырылуы мүмкін. Ал Трампқа қастандық жасамақ болғаны үшін оған өмір бойы бас бостандығынан айыру жазасы берілуі де мүмкін.

Әділет министрлігі сейсенбіде бұл айыптауды Майамидің үлкен сот алқасы мақұлдағанын хабарлады.